900 മില്യണ്‍ അംഗങ്ങള്‍..!
ഒരു ഭൂഖണ്ടമായിരുന്നെങ്കില്‍ ആഫ്രിക്കയുടെ തൊട്ടു പിന്നില്‍..!
മൊത്തത്തില്‍ ഒരന്താരാഷ്ട്ര പ്രതിഭാസം..!
സംഗതി എന്താണെന്ന് തെളിച്ചു പറയേണ്ടതില്ലല്ലോ..
ബാങ്കില്‍ അക്കൗണ്ട്‌ ഇല്ലാത്തവര്‍ കണ്ടേക്കാം,പക്ഷെ,ഫേസ് ബുക്കില്‍ അക്കൗണ്ട്‌ ഇല്ലാത്തവര്‍ വിരളമായിരിക്കും.
നിത്യജീവിതത്തില്‍ ഒരു തവണയെങ്കിലും അതുവഴി പോവുകയോ,അല്ലെങ്കില്‍ അത് സംബന്ധമായി സംസാരിക്കുകയോ ചെയ്യാത്തവരുണ്ടോ?
കുടുംബ ബന്ധങ്ങള്‍ ചുരുങ്ങിച്ചുരുങ്ങി നാനോ കുടുംബങ്ങളായി മാറിയ ഇക്കാലത്ത് ഈ ബുക്ക് വഴിയാണ് മരണങ്ങളും ജനനങ്ങളുമറിയുന്നത്..,
വിവാഹങ്ങളും,വാര്‍ഷികങ്ങളുമറിയുന്നത്..,
പിറന്നാളുകളും,പെരുന്നാളുകളുമറിയുന്നത്..
തമ്മില്‍ കണ്ടിട്ട് മിണ്ടാത്തവര്‍ പോലും ഫേസ്ബുക്കില്‍ കണ്ടുമുട്ടിയാല്‍ ഹൈ പറയുമെന്നതില്‍ രണ്ട് പക്ഷമില്ല..
അകന്ന ബന്ധത്തിലുള്ള ബന്ധുക്കളുമായി അടുപ്പം സ്ഥാപിച്ചു എന്നത് എന്റെ വ്യക്തിപരമായ അനുഭവം.
വിവാഹാലോചനകള്‍ നടക്കുമ്പോള്‍ ഇപ്പോള്‍ ഒന്നാമത്തെ ചോദ്യം ഫേസ് ബുക്കിലുണ്ടോ എന്നാണ് !
ഫോട്ടോ കാണല്‍ മാത്രമല്ല,അഭിരുചികളും ഇഷ്ടാനിഷ്ടങ്ങളും അറിയാം,കൂട്ടുകെട്ട് അറിയാം,ഒരു സി ബി ഐ ഉള്ളിലുണ്ടെങ്കില്‍ കുരുത്തക്കേട്‌ ഉണ്ടോന്നും ചികഞ്ഞു നോക്കാം.
എന്ന് വിചാരിച്ചു ഫേസ് ബുക്കിനെ കണ്ണടച്ച് വിശ്വസിച്ചു പെണ്ണിനേയും ചെറുക്കനേയും തെരഞ്ഞെടുക്കല്ലേ..അതും ഒരു വഴിയാണെന്ന് മാത്രം.
കാരണവന്മാര്‍ കല്യാണമുറപ്പിച്ച് വന്ന് കയറേണ്ട താമസം പെണ്‍പിള്ളേര്‍ ഫേസ്ബുക്കില്‍ കയറി സ്റ്റാറ്റസ് അപ് ഡേറ്റ് ചെയ്യുകയായി.single നിന്നും engaged !!
പൊങ്ങച്ചക്കാര്‍ക്ക് പൊങ്ങച്ചം വിളമ്പാം.പത്ത് പേര്‍ക്ക് ഫോണ്‍ ചെയ്തു കഷ്ട്ടപ്പെടുന്നതിന് പകരം ഒരു അപ്പ്‌ഡേറ്റ് കൊണ്ട് കാര്യം സാധിക്കാമല്ലോ.
പരീക്ഷാഫലക്കാലം ഫേസ് ബുക്കില്‍ ചാകരയാണ്..!
അതിനാല്‍ തന്നെ ബന്ധുക്കളുടെ മക്കളുടെ പഠന നിലവാരത്തെപ്പറ്റി ഇപ്പോള്‍ എല്ലാവര്‍ക്കും നല്ല ബോധമാണ്.ആര്, എവിടെ, ഏത് കോളേജില്‍, എത്രാം സെമെസ്റ്ററില്‍ പഠിക്കുന്നു എന്നതിനെപ്പറ്റി ആര്‍ക്കും യാതൊരു സംശയവുമില്ല..
സ്കൂള്‍ കാലത്തെ എന്റെ കൂട്ടുകാരായിരുന്ന സയീദയും റസാക്കും ദശകങ്ങള്‍ക്ക് ശേഷമിതാ വീണ്ടും എന്റെ സൌഹൃദ വലയത്തിലേക്ക് കടന്ന് വന്നിരിക്കുന്നു.
നാട്ടുകാരനായിട്ട് പോലും 3 ദശകങ്ങള്‍ക്ക് ശേഷമാണ് റസാക്കിനെ ഞാന്‍ കണ്ടുമുട്ടുന്നത് !
ഫേസ് ബുക്കില്‍ വെച്ച് !
ഒന്നാം ക്ലാസ് മുതലുള്ള കാര്യങ്ങള്‍ അയവിറക്കിയപ്പോള്‍ ആ ബ്ലാക്ക്‌ &വൈറ്റ് പിക്ചര്‍ എത്ര മനോഹരം എന്ന് പറയാതെ വയ്യ..
അറിയപ്പെടാതെ പോയ ആ ബഹുമുഖപ്രതിഭ ഇപ്പോള്‍ വലിയൊരു കമ്പനിയില്‍ Six sigma project leader ആണെന്ന് കേട്ടപ്പോള്‍ സന്തോഷം കൊണ്ട് ഞാന്‍ ദൈവത്തെ സ്തുതിച്ചു പോയി.അര്‍ഹിക്കുന്ന അംഗീകാരം എപ്പോഴായാലും തേടിയെത്തും എന്ന് പറയുന്നതെത്ര സത്യം!
എന്റെ പ്രിയപ്പെട്ട കൂട്ടുകാരി സയീദയുമായി വര്‍ഷങ്ങള്‍ക്കു ശേഷം ചറ പറാ വര്‍ത്താനം പറയാന്‍ കഴിഞ്ഞത് ഇപ്പറഞ്ഞ ബുക്ക് കാരണമാണ്.വിവാഹശേഷം രണ്ടുപേരും രണ്ടു വഴിക്കായതോടെ നിലച്ചു പോയ ഞങ്ങളുടെ സ്നേഹബന്ധം ഇന്ന് പൂര്‍വാധികം ശക്തിയോടെ ഈ പ്രിയപ്പെട്ട ബുക്ക് എനിക്ക് തിരിച്ചു തന്നു.
ദുബായിലെ ചൂടിങ്ങോട്ടും,ഇവിടുത്തെ മഴയങ്ങോട്ടും ഞങ്ങള്‍ പങ്കിടുകയാണ്...
നീളന്‍ ചാറ്റുകളില്‍ ഞങ്ങള്‍ പഴയ സ്കൂള്‍ കുട്ടികളായി മാറിപ്പോവുകയാണ്..
മധുരമനോഹരമായിരുന്ന ആ സ്കൂള്‍ കാല ഓര്‍മ്മകള്‍ ഇങ്ങിനെ വര്‍ണക്കുപ്പായവുമിട്ട് മുന്നിലെത്തുമ്പോള്‍ ഈ ബുക്ക് എനിക്കെങ്ങിനെ ഫേവറെയിറ്റ് ആകാതിരിക്കും??
റസാക്കുമായി ചാറ്റ് ചെയ്യുമ്പോള്‍ vocabulary മെച്ചപ്പെടുകയും,സയീദയുടെ കൂടെയിരിക്കുമ്പോള്‍ പ്രായം കുറയുകയും ചെയ്യുന്നുണ്ടെന്നാണ് എനിക്കിപ്പോള്‍ തോന്നുന്നത്..
സ്വപ്നത്തില്‍ പോലും
ഞാന്‍ പരിചയപ്പെടുമെന്ന് കരുതാത്ത,വിലമതിക്കാനാകാത്ത സൌഹൃദങ്ങള്‍ തൊട്ടടുത്ത്‌ കിട്ടിയത് ഫേസ് ബുക്ക് കാരണമല്ലേ?
ഇവിടെ വല്യുപ്പമാരെയും,വല്യുമ്മമാരെയും കണ്ടുമുട്ടുമ്പോള്‍ എന്റെയുള്ളില്‍ ഒരു സമാധാനവും സന്തോഷവുമാണ്.ഞാനിവിടെ അധികപ്പറ്റല്ല എന്ന ആശ്വാസം..
ഒമാന്‍ വിട്ട ശേഷം കൈവിട്ടെന്ന് കരുതിയ സഫിയ ഇതാ ഒരു ക്ലിക്കിനപ്പുറം!!
എന്റെ മക്കളുടെ കൂടെ കളിച്ച്‌ ചിരിച്ചു നടന്ന പിള്ളേര്‍ ഇന്ന് ലോകത്തിന്റെ നാനാ ഭാഗത്ത്‌ നിന്നും എന്നോടും കൂടെ കൂട്ട് കൂടുന്നു.കോട്ടയത്ത്‌ നിന്നും ഡോക്ടര്‍ വിദ്യ
'ആന്റീടെ pudding ന്റെ രുചി ഇപ്പോഴും ഓര്‍ക്കുന്നു' എന്ന് എഴുതിയത് കണ്ടപ്പോള്‍ സന്തോഷം കൊണ്ട് എനിക്കിരിക്കാന്‍ മേല...
അവളുടെ ആ കൊഞ്ചല്‍ വേറെ എവിടെ നിന്ന് എനിക്ക് കേള്‍ക്കാന്‍ പറ്റും?
ഫാമിലി ഗ്രൂപ്പ്‌ ആണ്‌ വേറൊരു ആകര്‍ഷണം.ശരിക്കുമൊരു കുടുംബ സദസ്സില്‍ പങ്കെടുത്ത ഉന്മേഷം കിട്ടാറുണ്ട് എനിക്കതില്‍ കൂടി.
പക്ഷെ,ചിലര്‍ ദിവസം ഒന്നിലധികം തവണ തുമ്മിയാല്‍ പോലും അത് എഫ് ബിയില്‍ ചുമരെഴുത്താക്കി മാറ്റിയേക്കും..ഇതിനാലൊക്കെയാവാം എന്റെയൊരു ബന്ധു പറഞ്ഞത് "അത് ഫേസ് ബുക്ക് അല്ല,ഫസാദ് ബുക്കാ..!"
ഗ്രൂപ്പുകളുടെ ആധിക്യം നിറയെ പരിചയക്കാരുള്ള കല്യാണ വീട്ടില്‍ കയറിയ പ്രതീതിയാണ്.ആരുടെ നേരെ നോക്കി ചിരിക്കണം,ആരോട് സംസാരിക്കണം എന്ന കണ്‍ഫ്യൂഷന്‍.
ഒരു ഫോട്ടോ കാണുമ്പോഴേക്കും സോ സ്വീറ്റ്, സോ ക്യൂട്ട് എന്ന് പറയുകയും,ഗൌരവതരമായ up dates കാണുമ്പോള്‍ നിശ്ശബ്ദരാവുകയും ചെയ്യുന്നത് എനിക്ക് ദഹിക്കാറില്ല.
പത്രങ്ങള്‍ മുക്കാന്‍ വിചാരിച്ച വാര്‍ത്തകളൊന്നും ഇനി മുങ്ങില്ല കൂട്ടരേ..അതൊക്കെ എഫ് ബിയില്‍ പൊങ്ങും..പത്രം വായിക്കാത്തവരും കൂടി ഫേസ് ബുക്ക് നോക്കുമല്ലോ.
പലരും ഇതിന്റെ മറുവശം ചിന്തിക്കുന്നുണ്ടാകും.പക്ഷെ,കറിക്കത്തി കൊണ്ട് പച്ചക്കറി മാത്രം അരിയുകയും,ബ്ലേഡ് കൊണ്ട് ഷേവ് മാത്രവും ചെയ്‌താല്‍ തീരുന്ന പ്രശ്നമേയുള്ളൂ...
അത് കൊണ്ട് ഞരമ്പ്‌ മുറിക്കാനും,ആളെ കൊല്ലാനും പോകുമ്പോഴാണ് കുഴപ്പം.
ഈ നൂറ്റാണ്ടില്‍ തന്നെ വാര്‍ത്തയായ അറബ്
വസന്തത്തില്‍ ഫേസ് ബുക്കിന്റെ കയ്യൊപ്പുണ്ട്.
അതേ പോലെ ഞങ്ങളുടെ അടുത്ത പ്രദേശത്ത് നടന്ന
ജനകീയസമരം ഫേസ് ബുക്കിലും നല്ല ഹിറ്റായിരുന്നു.അവരതില്‍ കൂടി നടത്തിയത് ഭീകരതയല്ല,അതിനാല്‍ത്തന്നെ ജാതിമത ഭേദമന്യേ,ദേശങ്ങളുടെ അതിര്‍വരമ്പ്
നോക്കാതെ ജനങ്ങള്‍ ആ കൂട്ടായ്മയില്‍ പങ്കാളികളായി.
ഇതൊക്കെയും മറുവശത്ത് കേള്‍ക്കുന്ന എല്ലാ മോശം പ്രചാരണങ്ങളെയും മായ്ക്കാന്‍ പോന്നതല്ലേ?
ഇനി എന്റെ മൂപ്പര്‍
അതില്‍ അക്കൗണ്ട്‌ തുറക്കുമ്പോള്‍ പറഞ്ഞതെന്താണെന്ന് കേള്‍ക്കണോ?"നീയൊക്കെ എന്താണ് കളിക്കുന്നതെന്ന് അറിയണമല്ലോ..!"
